Slider

காணொளிகள்

மன்னார் செய்திகள்

விம்பம்

உள்நாட்டு செய்திகள்

சர்வதேச செய்திகள்

பல்சுவை

School events

கல்வித்தளம்

மருத்துவம்

புகைப்படத்தளம்

கட்டுரைகள்

சினிமா

வவுனியாவில் உண்ணாவிரத போராட்டம்......காணாமல் போன உறவுகளுக்கு என்ன நடந்ததென பகிரங்கப்படுத்துங்கள்’ –

கடத்தப்பட்டு காணாமல் போன மற்றும் இராணுவத்தினரிடம் கையளிக்கப்பட்ட நிலையில் காணாமல் போன தமது உறவுகளுக்கு என்ன நடந்ததென்ற உண்மையை பகிரங்கப்படுத்த வேண்டுமென வலியுறுத்தி, காணாமல் போனோரை கண்டறியும் குடும்பங்களின் சங்கத்தினர் வவுனியாவில் தொடர் உண்ணாவிரத போராட்டத்தை ஆரம்பித்துள்ளனர்.

காணாமல் போனோரை தேடிக் கண்டறியும் குடும்பங்களின் சங்கங்கள் மற்றும் வவுனியா மாவட்டத்தைச் சேர்ந்த சிவில் சமூக பொது அமைப்புகள் இணைந்து இன்று (திங்கட்கிழமை) காலை இத் தொடர் உண்ணாவிரத போராட்டத்தை ஆரம்பித்துள்ளனர்.

வவுனியா கந்தசுவாமி ஆலயத்தில் இன்று காலை பூஜை வழிபாடுகளில் ஈடுபட்ட ஆர்ப்பாட்டக்காரர்கள், அதனைத் தொடர்ந்து வவுனியா நகரசபைக்குச் சென்று நகர சபை முன்றலில் இத் தொடர் உண்ணாவிரத போராட்டத்தை ஆரம்பித்துள்ளதாக  தெரிவித்தார்.

காணாமல் ஆக்கப்பட்ட தமது உறவுகள் உயிருடன் இருக்கின்றார்களா இல்லையா? உயிருடன் இருந்தால் எங்கு தடுத்து வைக்கப்பட்டுள்ளனர்? உயிருடன் இல்லையென்றால் அவர்களுக்கு என்ன நடந்ததென்ற உண்மையை அரசாங்கம் பகிரங்கப்படுத்த வேண்டுமென ஆர்ப்பாட்டக்காரர்கள் வலியுறுத்தியுள்ளனர்.

அத்தோடு, தடுப்பில் உள்ள சகல அரசியல் கைதிகளையும் விடுவித்து அவர்கள் தம் குடும்பத்தாரோடு சேர்ந்து வாழ வழியேற்படுத்தித் தரவேண்டும் என்றும் கோரிக்கை விடுத்துள்ளனர்.

காணாமல் போன தமது உறவுகளை தேடித் தடுமாறு வலியுறுத்தி பல போராட்டங்கள் நடத்தப்பட்டு பலரிடம் கோரிக்கை விடுத்து எவ்வித தீர்வும் கிடைக்காத நிலையில், அரசாங்கம் இனியும் காலம் தாழ்த்தாது தமது உறவுகள் குறித்த உண்மையை இப்போதாவது வெளிப்படுத்த வேண்டுமென உறவுகளை தொலைத்தவர்கள் கோரிக்கை விடுத்துள்ளனர்.
 






காணாமல் போன உறவுகளை மீட்டுத்தரக்கோரி வவுனியாவில் உண்ணாவிரதப் போராட்டம்

தமிழர் தாயகத்தில் கையளிக்கப்பட்டு காணாமல் போன உறவுகளை தேடிக்கண்டறியும் குடும்பங்களின் சங்கத்தினர் சாகும் வரையிலான உண்ணாவிரதப் போராட்டம் ஒன்றினை முன்னெடுக்கவுள்ளதாக அறிவித்துள்ளனர்.

நான்கு முக்கிய கோரிக்கைகளை வலியுறுத்தி, சாகும் வரையிலான உண்ணாவிரதப் போராட்டத்தை நடத்தவுள்ளதாக ஜனாதிபதி, பிரதமர் மற்றும் எதிர்க்கட்சித்தலைவர் ஆகியோருக்கு கையொப்பமிட்டு அறிவுறுத்தல் கடிதம் ஒன்றை( 20 .01 .2017 ) அனுப்பி வைத்துள்ளனர்.

வவுனியாவில் மாவீரன் பண்டாரவன்னியன் உருவச்சிலைக்கு முன்பாக எதிர்வரும் திங்கட்கிழமை அன்று காலை 8.00 மணியிலிருந்து சாகும் வரையிலான உண்ணாவிரதப் போராட்டத்தை ஆரம்பிக்கவுள்ளதாக குறித்த சங்கத்தின் வவுனியா மாவட்டத்தலைவி ஜெயவனிதா காசிப்பிள்ளை தெரிவித்துள்ளார்

ஜல்லிக்கட்டுக்கு ஆதரவு தெரிவித்து வவுனியாவில் ஆர்ப்பாட்டம்

இந்தியாவில் தடை செய்யப்பட்ட ஜல்லிக்கட்டுக்கு நீதிமன்றம் அனுமதி வழங்கவேண்டும் என கோரி (வெள்ளிக்கிழமை) வவுனியா நகர மத்தியில் ஆர்ப்பட்டம் ஒன்று இடம்பெற்றது.

வவுனியா மாவட்ட இளைஞர்கள் மற்றும் முகநூல் நண்பர்களால் ஏற்பாடு செய்யப்பட்ட இந்த ஆர்ப்பாட்டத்தில் 70 இற்கும் மேற்பட்ட இளைஞர்கள் கலந்துகொண்டிருந்தனர்.

இதன்போது, ஜல்லிக்கட்டுக்கு அனுமதி வழங்கு, தமிழர்களின் வீர வளையாட்டை தடை செய்யாதே உட்பட பல்வேறு வாசகங்கள் எழுதப்பட்ட பதாதைகளை ஏந்தியவாறு ஆர்ப்பாட்டக்காரர்கள் கோசங்களை எழுப்பியிருந்தனர்.

இந்த போராட்டத்தில் வட மாகாணசபை உறுப்பினர் செ. மயூரன், வவுனியா நகரசபையின் முன்னாள் உப நகரபிதா சந்திரகுலசிங்கம் மற்றும் கலைஞர்கள் பலரும் கலந்துகொண்டிருந்தனர்.



வவுனியாவில் தொழில் நுட்ப ஆய்வு கூட திறப்பு விழா

உள்ளூராட்சி மற்றும் மாகாண சபைகள் அமைச்சின் ஊடாக உலக வங்கி மற்றும் அவுஸ்திரேலியா நாட்டின் நிதி உதவியுடன் வ/கனகராயங்குளம் மகா வித்தியாலயத்தில் வடிவமைக்கப்பட்ட தொழில்நுட்ப ஆய்வு கூடம் வன்னி மாவட்ட பாராளுமன்ற உறுப்பினர் கௌரவ கே.காதர் மஸ்தான் அவர்களின் அழைப்பின் பேரில் மாகாண சபைகள் உள்ளூராட்சி அமைச்சர் கௌரவ பைசர் முஸ்தபா அவர்களால்

இன்று (19/01/2017) திறந்து மாணவர்கட்கு அர்ப்பணிக்கப்பட்டது. இந் நிகழ்வில் பாராளுமன்ற உறுப்பினர்கள்,மாகாண சபை உறுப்பினர்கள் அமைச்சின் செயலாளர்கள் , பாடசாலை நிர்வாகத்தினர் மற்றும் மாணவர்களும் பொது மக்களும் கலந்து சிறப்பித்தனர் .









வவுனியாவில் பதற்றம்..! மத்திய பேருந்து நிலையத்தில் மோதல் - பொலிஸார் குவிப்பு...


வவுனியா மத்திய பேருந்து நிலையத்தில் அரச மற்றும் தனியார் பேருந்து சங்க உறுப்பினர்களுக்கு இடையில் மோதல் ஏற்பட்டதுடன், வவுனியாவில் பதற்றமான நிலை ஏற்பட்டுள்ளது.

இது குறித்து தெரியவருவதாவது,

இன்று காலை அரச பேருந்து நிலையத்திற்குச் சென்ற பொலிஸார் அரச பேருந்துகளை நேற்று புதிதாக திறக்கப்பட்ட பேருந்து நிலையத்திற்கு கொண்டு செல்லுமாறு தெரிவித்தனர்.

இதற்கு பேருந்து நிலையத்தில் நின்ற பேருந்து சாரதிகள், நடத்துனர்கள் மறுப்புத் தெரிவித்ததுடன் தமது மேலதிகாரியிடமிருந்து உத்தரவு கிடைக்கவில்லை என்று தெரிவித்தனர்.

இரு பகுதியினருக்கும் இடையே நீண்ட நேரம் பேச்சுக்கள் இடம்பெற்றுக் கொண்டிருந்த சமயம் தனியார் பேருந்து ஒன்று அரச பேருந்து தரிப்பிடத்திற்குள் நுழைந்ததையடுத்து இரு பகுதியினருக்கும் இடையே மோதல் தோன்றியது.

இதனிடையே வவுனியா வர்த்தகர் சங்கத்தினரும் பேருந்து தரிப்பிடத்திலுள்ள முச்சக்கரவண்டி சாரதிகளும் அரச பேருந்து சாரதிகளுக்கு ஆதரவு தெரிவித்து பேருந்து நிலையப் பகுதிகளிலுள்ள வியாபார நிலையங்களை மூடி தமது ஆதரவினைத் தெரிவித்துள்ளனர்.

எனினும் பதற்றமான நிலை அப்பகுதி எங்கும் நீடித்து வவுனியா பொலிஸ் நிலையம் வரை நீடித்துள்ளது.
இதையடுத்து சம்பவ இடத்திற்கு விரைந்த பொலிஸார் பாதுகாப்பு கடமையில் ஈடுபடுத்தப்பட்டுள்ளனர்.

11.30 மணியளவில் பொலிஸாரின் தலையீட்டையடுத்து அரச மற்றும் தனியார் பேருந்து சங்க உறுப்பினர்களிடையே வன்னி பிராந்திய பிரதிப் பொலிஸ்மா அதிபர் காரியலாயத்திற்கு அழைத்துச் செல்லப்பட்டுள்ளனர்.

பேருந்துக்களை செல்லவிடாமல் அரச மற்றும் தனியார் பேருந்து சாரதிகள் பேருந்துக்களுக்கு முன்னால் அமர்ந்து இருந்து வருகின்றனர். வெளிமாவட்டங்களிலிருந்து வரும் பேருந்துகளை வழிமறித்து தாக்கி வருகின்றனர்.


அதனால் அக்கரைப்பற்றிலிருந்து யாழ்ப்பாணம் நோக்கிச் செல்லும் பேருந்து வவுனியா பேருந்து நிலையத்தில் வைத்து தனியார் பேருந்து சாரதிகளால் தாக்குதலுக்குள்ளாகியுள்ளது.

இரு பகுதியினரையும் அழைத்துச் சென்ற பொலிஸார் வரும்வரை வழிவிடமுடியாது என்று தெரிவித்து வீதியை மறித்து போக்குவரத்தை இடை நிறுத்திவருகின்றனர்.

சம்பவ இடத்திற்கு வடமாகாண சபை உறுப்பினர் செ. மயூரன், வன்னி மாவட்ட நாடாளுமன்ற உறுப்பினர் கே. கே. மஸ்தானின் பிரதி நிதிகளும் பேருந்து நிலையத்திற்குச் சென்று அரச தனியார் பேருந்து சாரதிகளுடன் கலந்துரையாடினார்கள்.


இதனிடையே பொலிஸாருடன் இடம்பெற்ற பேச்சுக்களில் வடமாகாண சபை உறுப்பினர் செ. மயூரன், வர்த்தகர் சங்கம் தனியார் அரச பேருந்து சங்க உறுப்பினர்கள் கலந்து கொண்டனர்.

இதில் முன்னைய நடைமுறையினை ஒரு சுமூகமான சூழ்நிலை உருவாகும் வரை பின்பற்றுமாறு பொலிஸார் அரச பேருந்து நிலையத்திற்கு தெரிவித்துள்ளனர்.

இதையடுத்து வர்த்தகர் சங்கத்தினால் மூடப்பட்ட வர்த்தக நிலையங்களை திறக்குமாறு வர்த்தக உரிமையாளர்களுக்கு அறிவுறுத்தப்பட்டுள்ளது. அரச பேருந்துகள் தமது சேவையினை மேற்கொள்ளமாறு அறிவிக்கப்பட்டுள்ளது.


இன்று காலை புதிய பேருந்து நிலையத்தில் தமது கடமைகளை ஆரம்பித்த தனியார் பேருந்துகள் முன்னைய நடைமுறையினை பின்பற்ற முடிவு மேற்கொண்டு வருவதாக தெரிவித்துள்ளனர்.

பிற்பகல் 12.30 மணியளவில் பதற்றமான சூழ்நிலை அகன்று வருகின்றது. எனினும் பெருமளவானவர்கள் இரு பகுதியிலும் காணக்கூடியதாகவுள்ளது.

பொலிஸார் தமது கடமைகளை மேற்கொண்டு வருகின்றனர். அரச பேருந்துகளை சேவையில் ஈடுபடுத்துமாறு ஒலி பெருக்கியில் அறிவுறுத்தல் வழங்கப்பட்டுள்ளமை குறிப்பிடத்தக்கது.

வவுனியா ஓமந்தையில் கை, கால் கட்டப்பட்ட நிலையில் ஒருவர் மீட்பு

வவுனியா ஓமந்தையில் இன்று (16.01.2017) காலை   கை, கால் கட்டப்பட்ட நிலையில் ஒருவர் ஓமந்தை காட்டுப்பகுதியில் கிடப்பதாக ஒமந்தை பொலிஸாருக்கு கிடைத்த தகவலின் அடிப்படையில் சம்பவ இடத்திற்கு விரைந்த  ஒமந்தை பொலிஸார் குறித்த நபரை மீட்டு வவுனியா மாவட்ட பொது வைத்தியசாலை தீடிர் விபத்துப்பிரிவில் அனுமதித்துள்ளனர்.

இச் சம்பவம் பற்றி மேலும் தெரியவருவதாவது,

கடந்த (30.12.2016) அன்று கணவன் மனைவி இருவரும் வவுனியா செட்டிக்குளம் உறவினரின் இறுதிக்கிரியைக்கு சென்று கொண்டிருக்கும் போது வவுனியா தாண்டிகுளத்தில் மனைவி (நிஷாந்தன் யாழினி வயது 34) அவசரமாக கனகராயன்குளம் செல்லவேண்டியுள்ளதாக தெரிவித்து பேரூந்திலிருந்து இறங்கியுள்ளார். எனினும் கணவன் உறவினரின் இறுதிக்கிரியைக்கு சென்றுள்ளார்.

மனைவி மாலையாகியும் வீட்டுக்கு வராததையடுத்து கணவரால் கனகராயன்குளம் பொலிஸ் நிலையத்தில் முறைப்பாடு ஒன்று மேற்கொள்ளப்பட்டது.

கடந்த 02.01.2017 அன்று கடமைக்காக குறித்த நபர் ( தனபாலசிங்கம் நிஷாந்தன் வயது – 33 ) மன்னார் நோக்கி பேரூந்தில் பயணித்துள்ளார். எனினும் இவர் மன்னார்க்கு செல்லவில்லை இதனையடுத்து குறித்த நபரின் தந்தையினால் மகனை காணவில்லையோன்று  கனகராயன்குளம் பொலிஸ்நிலையத்தில் முறைப்பாடு செய்யப்பட்டது.

இன்றைய தினம் (16.01.2017) காலை ஓமந்தை பஸ்தரிப்பிடத்திற்கு அருகே காணப்படும் காட்டுப்பகுதியில் கை,கால் கட்டப்பட்ட நிலையில் ஓமந்தை பொலிசாரால் மீட்கப்பட்டு வவுனியா விபத்து பிரிவில் அனுமதிக்கப்பட்ட நிலையில் சிகிச்சை பெற்று வருகின்றார்.

மேலதிக விசாரணைகளை ஓமந்தை பொலிசார் மேற்கொண்டு வருகின்றனர்.

வவுனியாவில் பிரமாண்டமான முறையில் பேரூந்து நிலையம் திறந்து வைப்பு...




வவுனியா, யாழ் வீதியில் அமைக்கப்பட்ட புதிய மத்திய பேரூந்து நிலையத்தை மத்திய போக்குவரத்து துறை அமைச்சர் நிமால் சிறிபால டி சில்வா இன்று (16.01.2016) திறந்து வைத்தார்.

மத்திய அராங்கத்தினால் 195 மில்லியன் ரூபாய் செலவில் அமைக்கப்பட்ட உள்ளூர் மற்றும் மாகாணங்களுக்கிடையிலான போக்குவரத்தை மேற்கொள்கின்ற பேரூந்துக்களுக்கான பிரதான தரிப்பிடமே திறந்து வைக்கப்பட்டுள்ளது.

இதில் 13 பேரூந்துகள் மாகாணங்களுக்கிடையிலான சேவையிலும், 21 பேரூந்துகள் உள்ளூர் சேவையிலும் ஈடுபடத்தக்க வகையில் ஏ9 வீதியில் மூன்று ஏக்கர் நிலப்பரப்பில் நாளாந்தம் 100 பேரூந்துகள் வந்து செல்லத்தக்க வகையில் நவீன முறையில் இப் பேரூந்து நிலையம் அமைக்கப்பட்டுள்ளது.

இலங்கை போக்குவரத்து ஆணைக்குழுவின் தலைவர் அபயசிங்க தலைமையில் நடைபெற்ற இந்நிகழ்வில் மத்திய போக்குவரத்து துறை அமைச்சர் நிமால் சிறிபாலடி சில்வா, பிரதி போக்குவரத்து அமைச்சர் அபேக்க அபேயசிங்க, வர்த்தக கைத்தொழில் அமைச்சர் றிசாட் பதியுதீன், பாராளுமன்ற உறுப்பினர்களான சி.சிவமோகன், கே.கே.மஸ்தான், வடமாகாண ஆளுனர் றெஜினோல்ட் கூரே, வடமாகாண போக்குவரத்து அமைச்சர் பா.டெனீஸ்வரன், வடமாகாண சபை உறுப்பினர்களான கமலநாதன், ஜி.ரி.லிங்கநாதன், ம.ஜெயதிலக, அரசாங்க அதிபர் ரோஹண புஸ்பகுமார, தனியார் பேரூந்து சஙகத் தலைவர் மற்றும் அதன் உரிமையாளர்கள், இலங்கை போக்குவரத்து சபையினர் எனப்பலரும் இதில் கலந்து கொண்டனர்.








-வன்னி மாவட்ட பாராளுமன்ற உறுப்பினர் வைத்திய கலாநிதி சி.சிவமோகனின் நிதி ஒதுக்கீட்டில் பல்வேறு உதவித்திட்டங்கள் வழங்கி வைப்பு-(படம்)



தமிழ் தேசியக்கூட்டமைப்பின் வன்னி மாவட்ட பாராளுமன்ற உறுப்பினர் வைத்திய கலாநிதி சி.சிவமோகனின் நிதி ஒதுக்கீட்டில்  நேற்று சனிக்கிழமை(14)பல்வேறு உதவித்திட்டங்கள் மேற்கொள்ளப்பட்டுள்ளது.

துணுக்காய் பிரதேச செயலாளர் பிரிவிற்குட்பட்ட ஐயங்கங்குளம் மாதர் கிராம அபிவிருத்தி சங்கத்தினருக்கு தளபாடங்களும், கோட்டை கட்டிய குளம் கிராம அபிவிருத்தி சங்கத்திற்கான ஒலி பெருக்கி சாதனம், அம்பலபெருமாள் குளம் விளையாட்டுக் கழகத்திற்கான சீருடைகள், கல்விளான் பாடசாலைக்கான நீர் இறைக்கும் இயந்திரம் என்பனவும் பிரதேச செயலகத்தில் வைத்து வன்னி மாவட்ட பாராளுமன்ற உறுப்பினர் வைத்திய கலாநிதி சி.சிவமோகன் அவர்களால் உரிய அமைப்புகளுக்கு வழங்கி வைக்கப்பட்டது.

இந்நிகழ்வில் கல்விளான் அரசினர் தமிழ் கலவன் பாடசாலையின் அதிபர், மல்லாவி பிரதேச வர்த்தக சங்கத்தின் செயலாளர், வன்னி குறோஸ் சுகாதார நிறுவனத்தின் மல்லாவி பிரதேச ஒருங்கிணைப்பாளர் ரமேஸ், மாதர் கிராம அபிவிருத்தி சங்க உறுப்பினர்கள், விளையாட்டு கழக உறுப்பினர்கள் பலரும் கலந்து கொண்டனர்.

 இதே வேளை மாந்தை கிழக்கு பிரதேச செயலாளர் பிரிவிற்குட்பட்ட நட்டாங்கண்டல் விளையாட்டு கழகத்திற்கான விளையாட்டு உபகரணங்களும், பொன்னகர், விநாயகபுரம், பூவரசங்குளம் கிராமங்களை உள்ளடக்கி தகர கொட்டகைகளும் மாந்தை கிழக்கு பிரதேச செயலகத்தில் வைத்து வழங்கி வைக்கப்பட்டது.

இந்நிகழ்வில் வன்னி மாவட்ட பாராளுமன்ற உறுப்பினர் கௌரவ வைத்திய கலாநிதி சி.சிவமோகன் கலந்து கொண்டு பொருட்களை வழங்கி வைத்ததோடு தனது கருத்துக்களை தெரிவித்தார். பொது அமைப்புகளுக்கு வழங்கப்படுகின்ற இப் பொருட்கள் பாதுகாக்கப்பட்டு மக்களின் தேவைகளுக்கு வழங்கி உதவ வேண்டும் என்றும், தொடர்ந்தும் இது போன்ற உதவித்திட்டங்கள் ஏனைய கிராமங்களுக்கும் வழங்கப்படும்.

இந்த அமைப்பு திறம்பட செயற்பட்டு கிராமங்களில் நடைபெறும் பொது நிகழ்வுகள், மரண நிகழ்வுகள் என்பனவற்றுக்கு இலவசமாக வழங்கி மக்களுக்கு பணியாற்ற முன்வர வேண்டும் என்றார்.
 இந்நிகழ்வில் பிரதேச செயலகத்தின் உதவித்திட்டமிடல் பணிப்பாளர், விளையாட்டு கழகங்களின் உறுப்பினர்கள், கிராம பொது அமைப்புக்கள் என பலரும் கலந்து கொண்டனர்.


-மன்னார் நிருபர்-
  (15-1-2017)





Photos